Sinulog wa’y uwan, santo papa uwanon
CEBU, Philippines - Gibutyag sa Philippine Atmospheric Geophysical Astronomical Services Administration (PAGASA) nga maayo ang panahon atol sa Sinulog 2015.
Matud ni Engr. Oscar Tabada, direktor sa PAGASA-Visayas, nga gikan karon makasinati lang og panganuron ug hinay ngadto sa kasarangan nga hangin.
Makasinati sab og katag-katag nga pag-uwan ug kusog nga hangin ang Sugbo ug ubang bahin sa Kabisay-an sa Miyerkules ug sa Biyernes.
Sa adlaw’ng Sabado nga mao ang bisperas sa fiesta ni Señor Sto. Niño ug ipahigayun ang fluvial ug foot procession masinati ang mga pag-uwan tungod sa Low Pressure Area.
Atol sa Sinulog Grand Parade makasinati og pag-uwan sa sayong buntag apan sa tibuok adlaw ngadto na sa kagabhion masinati na ang maayong panahon.
Apan giklaro ni Tabada nga posible pa nga mausab ang dagan sa panahon sa bisperas ug adlaw sa kapistahan ilabi na unya sa pagsulod sa LPA sa Miyerkules ug may posibilidad nga mahimo kini’ng unang bagyo karong tuiga nga tawgon og Amang.
Hinungdan nga napanglantawan nga uwanon ang pagduaw ni Pope Francis sa Eastern Visayas sa sunod Sabado.
Gani gipahimangnoan ni Tabada ang mga buot motambong sa Santos nga Misa ni Pope Francis sa Leyte nga molawig na daan sa petsa 14 aron di na matanggong sa pantalan. (Decemay P. Padilla/GMR)(BANAT NEWS)
- Latest
