Motor nabag-iran, drayber patay

CEBU, Philippines - Patay ang drayber sa motorsiklo nga nasaghiran sa kasugat nga cargo van ug naligsan sa nagsunod nga sports utility vehicle (SUV) sa barangay Pasol, lungsod sa Alcoy pasado alas 5 sa hapon sa nakalabay nga adlaw.

Ang biktima naila nga si Russel Alipin, 37, taga barangay Baclayan, lungsod sa Boljoon.

Samtang ang drayber sa cargo van naila nga si Prospero Cantillep, 41, nagtrabaho sa Dranex Company nga taga dakbayan sa Lapu-Lapu ug ang drayber sa SUV naila nga si Egardo Apolinar, hingkod nga taga Candaping, Maria, Siquijor.

Matud ni PO2 Leo Gesim sa Alcoy Police Station nga samtang nagdagan ang motorsiklo, nasugatan ang cargo van ug aksidente nga nabag-iran ug dayun natumba sa karsada. Tayming nga nagsunod ang SUV nga gimaneho ni Apolinar ug aksidente’ng naligsan ang motorsiklo hinungdan sa kamatayun ni Alipin.

Sigun pa ni Gesim nga temporaryo una nga gikustodiya sa buhatan sa Alcoy Police ang duha ka drayber sa duha ka sakyanan.

Apan si Gesim miingon nga posible’ng ma-settle ra ang tulo ka habig human iyang nahibaw-an nga dunay panag-areglo nga gikasabutan. (BANAT NEWS)