Tour guide gipatay sa hantakan
CEBU, Philippines - Usa ka local tour guide nga nakadaog sa “hantak” ang giulo sa pagpusil sa iyahang kaduwa diha sa Sitio Guisi, Barangay Agus sa dakbayan sa Lapu- Lapu.
Giila ni Police Officer 2 Joseph Rouel Cutanda sa Lapu-Lapu City Police Office ang biktima nga si Wendel Fuentes, taga Ibabao-Agus, samtang ang suspetsado nga nailhan lang sa alyas nga “Mano” gamit ang usa ka wala matinong armas.
Gikatahong dako na og daog sa hantak ang biktima ug midesisyon nga molakaw na kay sugaton pa niya iyang bisita apan kalit nga mibarog ang suspek nga dako na og pilde ug milipot sa luyo ni Fuentes. Dihadiha gidul-itan niini pagpusil ang ulo sa biktima samtang naghakop kini sa iyang daog diha sa antogan hinungdan sa pagkatibulaag sa mga sugarol.
Human niini, gihakop sa suspek ang daog unta sa biktima ug giapil og kuha ang cellphone ug pitaka niini ug dali nga miikyas.
Mga rolyo sa tin foils, lighter ug usa ka 25 centavo nga sensilyo nga gihimong antogan lang ang nakuha diha sa crime scene.
Samtang usa ka Ronald Reyes Laguna, 31, ang nadakpan sa kalit nga pagronda sa mga sakop sa Special Weapons and Tactic (SWAT) sa Danao City Police Station diha sa dalan Juan Luna, Barangay Poblacion.
Nakuha gikan sa suspek ang usa ka paketeng shabu samtang nakadagan ang ubang sugarol. (BANAT NEWS)
- Latest
