Mayor Radaza nalipay nga matukod ang 3rd bridge

CEBU, Philippines – Gisuportahan ni Lapu-Lapu City Mayor Paz Radaza ang proyekto nga pagtukod og ikatulo nga tulay nga magdugtong sa Cordova ug sa dakbayan sa Sugbo.

Aduna nay gihimo nga groundbreaking ceremony alang sa pagmugna  sa tulay nga gituohan nga makahatag og kasulbaran sa grabe’ng paghuot sa mga sakyanan nga moagi sa Mandaue-Mactan bridge ug Marcelo Fernan bridge. Si Mayor Michael Rama nahinangop usab kaayo sa mao nga kalamboan kay gawas nga makapalambo kini sa ekonomiya sa Cordova, sigurado nga makapasulbad kini sa problema sa trapiko sa Mandaue ug ubang dapit sa dakbayan sa Sugbo.

Matud ni Rama nga dunay mga sakyanan nga anha na lang unya moagi sa ikatulo nga tulay ug sa ingon mokunhod ang mga moagi sa Mandaue.

Ang ikatulo’ng taytayan mosumpay sa usa ka bahin sa Barangay Pilipog habig sa “Shell Island” nga sakop sa Cordova apan nahimutang atbang ra sa Carbon. – /RUB) (BANAT NEWS)