CEBU, Philippines – Gipadala sa kagamhanan sa dakbayan sa Mandaue ang ilang water super tanker ngadto sa lungsod sa Ronda aron pag-supply og tubig sa mga barangay nga nakasinati og kadaut sa ilang patubig sa bagyong Seniang. Si Felix Suico, pangulo sa City Disaster Risk Reduction and Management Council (CDRRMC), maoy naghatud sa nahisgutang sakyanan uban sa usa ka drayber ug usa ka mekaniko.
Si Roger Paller, public information officer sa dakbayan, niingon nga ang maong water super tanker magpabilin hangtud sa tulo ka adlaw nga gidugayon.
Upat ka barangay sa lungsod sa Ronda ang naglisud sa ilang tubig nga mainom nga maoy serbisyohan sa water super tanker sa dakbayan ug kini mao ang barangay Poblacion, Ylaya, Tupas ug Palanas.
Dugang ni Paller nga wala’y obligasyon ang lokal nga kagamhanan sa Ronda sa tulo ka adlaw nga pagserbisyo sa water super tanker tungod kay giabaga man sa siyudad ang krudo ug sweldo sa mekaniko ug drayber.
Si Paller miingon nga ang lungsod sa Moalboal nga wala maapektohi ang ilang supply sa tubig sa bagyo ang dapit nga kuhaan og tubig nga isulod sa tangke. – /GMR) (BANAT NEWS)