CEBU, Philippines – Mabatyagan na sa siyudad sa Sugbo ang “Sinulog fever” tungod sa mga naglagubo nga mga sound systems nga nagpatukar og Sinulog beat ug ang “Batobalani sa Gugma” nga makapabuhi sa dugo ug makapanimbawot sa balahibo.
Luyo niining pangilin sa Senyor Sto. Niño, daghang mga tawo ang nangalipay tungod sa kitaon nila gikan sa nagkalain-laing mga baligya nga may kalambigitan sa Sinulog nga maoy halinon kaayo niining bulana.
Usa na niini ang mga mamaligyaay og kandila sa Basilica Minore del Sto. Niño nga “mo-sinulog” usab sa ilang paghalad sa gidagkotang kandila nga gipamalihog kanila bugti sa pipila ka piso.
Usa kanila ang 70-anyos nga si Lola Agripina Espinosa Pantilgan nga lumad nga taga Kan-asohan, sa dakbayan sa Carcar.
Si Lola Agripina 30 ka tuig nang naninda ug nagsinulog sa basilica kauban ang iyang mga silingan, sama sa iyang mga kaubanang manindahay, usa usab siya ka deboto ni Senyor Sto. Niño.
Matud niya nga naaghat siya og paninda og kandila kaniadto dihang namatay ang iyang anak nga lalaki nga si Carlos, matud niya pinaagi sa pagbaligya ug paghalad og kandila sa Balaang Bata inanay niyang nadawat ang pagkawala sa iyang anak ug nahupay ang iyang kagul-anan.
Si Lola Agripina kinsa nagluha ang mga mata nga miasoy nagkanayon nga si Carlos kinsa 21-anyos niadtong higayona nanarbaho kini didto sa lungsod sa Daanbantayan ug giingong nasakit hangtud nga namatay.
“Nag-ampo g’yud ko aron maayo ang panglawas sa ako’ng anak apan siguro pagsuway ang nahitabo hinungdang namatay siya. Aron ‘ko malingaw ug mawala akong kaguol naaghat ko pagpaninda og kandila uban sa among mga silingan,” matud pa niya.
Nagpasalamat si Lola Agripina nga mitugot usab ang iyang bana dihang nananghid siya niini. Walo ang anak ni Lola Agripina, lima ang lalaki ug tulo ang babaye kinsa pulos na karon minyo. Gikan sa Lunes hangtud sa Biyernes naa si Lola Agripina sa basilica maninda og kandila gikan sa alas 5:30 sa buntag hangtud na sa alas 7:00 sa gabii ug anha siya magsakaan sa balay sa iyang pag-umangkon dinhi lang sa siyudad.
Si Lola Agripina nagkanayon nga sa adlaw’ng Sabado ug Domingo atoa siya sa Carcar aron magbuhat og kandila nga iyahang dalhon pagka-Lunes balik sa dakbayan sa Sugbo.
Ang pagpaninda og kandila mao nay gisuporta karon ni Lola Agripina sa ilang panginahanglanon ug sa iyang bana nga di na makapamanday tungod sa balatian sa lawas.
Matag adlaw ang halin ni Lola Agripina sa iyang tinda nga kandila gikan sa P200 hangtud sa P300.
Giangkon ni Lola Agripina nga sa iyang kasinatian isip manindahay og kandila malipay g’yud siya kun magbalikbalik ang mga tawo nga magpasinulog kaniya, kay nagtuo siya nga natuman ang ilang gihangyo ngadto sa Balaang Bata nga gipaagi sa iyang pagsinulog.
Sumala pa ni Lola Agripina, dunay usa ka higayon nga dunay usa ka babayeng nagpasinulog kaniya pahinungod sa amahan niini nga gipagawas na lang nila sa tambalanan tungod kay di na maayo ang hubag niini nga atay.
Tuod man, gidagkotan niya ang kandila ug nagsinulog (pagsayaw uban sa pagwara-wara sa kandila atubangan sa pultahan sa basilica) ug gilitok ang pangamuyo sa maong babaye ngadto sa Balaang Bata.
“Giingnan nako ang babaye nga iampo nato kay basin na lang, ang Senior ra man ang nahibawo, taas man Siya og gahum atong isalig Niya…..Misabat siya sa akong pangadye, katulo ‘to siya mibalik ug miingon siya nga naayo na ang iyang papa,” paambit ni Lola Agripina.
Ang maong babaye giingnan usab ni Lola Agripina nga kinahanglang magpasalamat sila kang Senior Santo Niño.
Gawas niini giingong dunay miduol nga usa ka bana kang Lola Agripina nga nanghangyo usab nga magpasinulog aron siya ug ang iyang asawa magkasinabtanay ug dili na magsige og away.
Matud usab ni Lola Agripina nga ang maong bana mibalik ug nagpasalamat kaniya tungod kay natuman ang iyang gipangayo kang Senior Santo Niño.
Apan dili lang kutob diha sa pagsinulog ang buhatong pag-ampo ni Lola Agripina alang sa tanang tawo nga miduol kaniya.
Sumala pa niya, sa dili pa siya matulog, subli niyang iampo ang mga tawong nagpasinulog kaniya aron manghangyo nga paminawon ug dunggon ang ilang gipangayo.
Si Lola Agripina simple lang ang gipangayo sa Balaang Bata alang sa iyang kaugalingong pamilya, hatagan sila kanunay og maayong panglawas aron sila makapanginabuhi sa matag adlaw.
Gihulagway ni Lola Agripina nga silang mga manindahay og kandila sa basilica matawag usab nga sumbonganan sa mga problema sa mga tawo. – /EIM) (BANAT NEWS)