Patay’ng lawas sa babaye, lalaki napalgan

CEBU, Philippines – Hubo nga patay’ng lawas sa usa ka babaye ang nakit-ang naglutaw-lutaw sa sapa sa Compostela samtang usa ka lalaki ang nalumos patay sa lungsod sa Medellin.

Wala pa mailhi ang patay’ng lawas sa babaye nga nakit-ang naglutaw sa sapa sa sitio Grahi-an, Cabadingan, lungsod sa Compostela niadtong Domingo sa buntag. Si PO3 Arni Goc-ong sa Compostela Police Station nagkanayon nga usa ka mananagat nga si Gorio Vergara ang nakakita sa patay’ng lawas samtang siya namasol.

Sa pasiunang imbestigasyon nasuta nga una’ng nakit-an ni Vergara ang patay’ng lawas niadtong Enero 1 apan iya lang kini’ng gibaliwala sa pagtuo nga patay’ng hayop lang nga naanod atol sa bagyong Seniang. Ikaduhang higayun nga namasol si Vergara ug nasuta nga usa ka patay’ng lawas sa usa ka babaye nga nagsugod na og kadugta.

Ang patay’ng lawas gibanabana nga nagpangedaron og 50 niadto sa 60 anyos ug may gitas-on nga 5'1".

Ang patay’ng lawas anaa sa Maturan Funeral Parlor sa lungsod sa Lilo-an.

Sa laing bahin, usa ka 48-anyos nga lalaki ang napalga’ng patay na nga naglutaw sa dagat sa barangay Mahawak, lungsod sa Medellin niadtong Domingo sa buntag.

Gikataho’ng na-missing ang usa ka Roberto Potestad, lumad nga taga Sagay, Negros Occidental, apan 20 ka tuig na nga nagpuyo sa Medellin.

Gituohang hubog si Potestad sa dihang nisakay og bangka paingon sa laing pumpboat aron unta iya kining susihon tungod kay nagsugod na og kusog ang paghapak sa bawod.

Si PO3 Rolandon Reyes mibutyag nga si Potestad ang caretaker sa maong pumpboat diin siya magkatulgan matag gabii.

Positibong nailhan sa kabanay nga si Ma. Wilma Delabajan ang patay’ng lawas ni Potestad ug nasuta sab sa medico-legal nga nahiagum og cardio-respiratory arrest si Potestad. – /GMR) (BANAT NEWS)