Patay nasangit sa pagatpatan

CEBU, Philippines - Gipaabot sa kapolisan ang tagtungod sa patay’ng lawas sa usa ka babaye nga napalgan nga nasangit sa pagatpatan sa sitio Looc, barangay Tayud, lungsod sa Consolacion alas 2 pasado ang takna niadtong Sabado sa hapon.

Si Police Officer 1 Gypsy Miro sa Consolacion Police Station miingon nga si Police Officer 3 Jesson Gayo sa Liloan Police Station ang nanawag sa ilang buhatan nga nagpahibalo labot sa patay’ng lawas nga napalgan sa usa ka residente nga si Estephane Buenaflor Judaya nga nagpuyo sa maong dapit.

Ang babaye gihulagway nga kasarangan ang panglawas, 5’4” ang gitas-on, nagsul-ob og green nga T-shirt ug anaa sa 40-anyos ang panuigon.

Apan dili pa masuta ang hinungdan sa kamatayon sanglit wala man sila nakamatikod nga adunay samad sa iyang kalawasan.

Si Miro miingon nga ilang gipahiluna sa usa ka punerarya sa lungsod ang patay’ng lawas.

Nagtuo si Miro nga dili molupyo sa maong dapit ang babaye kay ang mga nagpuyo sa maong dapit wala makaila niini.  (BANAT NEWS)