Opisina sa CITOM gamiton sa CCMC

CEBU, Philippines - Gibalhin sa siyudad sa Sugbo ang opisina sa City Traffic Operations Management ngadto sa Ramos Public Market aron mapadak-an ang pasilidad sa Cebu City Medical Center (CCMC).

Sumala ni City Administrator Dr. Lucelle Mercado nga kini maoy gimando ni Mayor Michael Rama aron pagbalik sa level 2 accreditation status sa tambalanan human kini gipaubsan ngadto sa level 1 sa Department of Health sa miaging tuig.

“For us to upgrade our status, we have to make improvements para mapadayon atong services. We can’t push through without a facility. This is for the best,” matud ni Mercado.

Kahinumduman nga ang tambalanan nakaangkon og grabeng kadaut human sa 7.2-magnitude nga linog niadtong 2013.

Ang CCMC sa pagkakaron temporaryong nag-okupar sa Bureau of Fire Protection-7 building. Apan human kini gibalhin sa BFP sa milabay’ng tuig, ang bed capacity niubos ngadto 108 gikan 300 beds.

Matud ni CCMC chief of hospital, Dr. Gloria Duterte, ang extension posibleng himuong obstetrics, gynecology, pediatrics, internal medicine, surgery ug ophthalmology departments aron i-upgrade kini isip 150 ngadto sa 200-bed capacity hospital.

Matud ni Mercado nga daku ang tabang sa CITOM office aron sa posibleng pagbalik sa CCMC og himo og major surgeries.

Ang pag-downgrade sa status sa CCMC nagpasabot lamang nga dili na kini makapahigayun og major surgeries isip usa na lang ka “infirmary” o “emergency hospital.”

Human ang himuong pag-ayo sa CITOM office karong buwan pwede na modawat ang CCMC og dugang pasyente, matud ni Mercado. (BANAT NEWS)

 

Show comments