P1.8M danyos sa sunog
CEBU, Philippines - Mokabat sa P1.8 miyones ang gibilin nga danyos sa sunog nga miigo sa Esteban Nolasco National Highway School sa lungsod sa Tabogon.
Matud pa ni Police Officer 3 Jesus Rios sa Tabogon Police nga nahinabi sa Banat News pasado alas- 4 sa sayo sa buntag miulbo ang sunog ug naugdaw ang library ug usa ka classroom nga duna’y sulod nga mga computer, telebisyon ug upan pang gamit.
Sigun pa ni Rios nga ang kabomberohan sa dakbayan sa Bogo mao’y una’ng nakaresponde gumikan kay ang lugar anaa nahimutang sa utlanan sa Tabogon.
“Naa’y fire truck giparking diri sir, guba-on mani, ang drayber naa ra pud nagtrabaho sa munisipyo, naa’y fire truck pero wala’y fire station,” matud pa ni Rios. Ang prinsipal sa maong tunghaan nga si Noel Usad mibana-bana sa danyos nga anaa sa P1.8 ka milyon.
Pasado na alas- 6 sa buntag napalong sa kabomberohan ang maong sunog ug wala sa’y natala nga naangol sa mao’ng hitabo.
Gisuwayan og kontak sa Banat News ang Bogo Fire Station aron pagtino sa hinungdan sa sunog apan dili makontak sa ilang telepono.
Samtang duha ka alarma sa sunog ang girespondehan sa mga bombero sa dakbayan saToledo sa pagsulod sa tuig 2015.
Dunay nahitabong sunog sa compound sa Atlas Fertilizer sa Barangay Daanglungsod ala-una sa hapon kagahapong adlawa human matud pa ni SFO2 Julius Dagatan nisilaob ang “SO2 plant gas scrubber” sa maong kompaniya.
Gituohan sa BFP Toledo electrical misuse ang hinungdan niini.
Nabulabog usab sa nakalabay’ng adlaw ang mga tawo sa Toledo City Public Market human napuot og itom nga aso ang usa sa mga kan-anan human giingong nabasa og tubig ang circuit breaker sa tupad niini. (BANAT NEWS)
- Latest
