Ambulansiya, multicab nagbangga

CEBU, Philippines - Naangol ang tulo ka tawo human nagbangga ang multicab sa barangay Lamacan, Argao ug ang ambulansiya sa lungsod sa Moalboal sa Valladolid, dakbayan sa Carcar alas 2:35 kagahapon sa hapon.

Ang drayber sa ambulansiya naila nga si Rogelio Martinez, 41, taga dalan Bonifacio, Lamacan, Argao diin sakay ang pasyente nga si Gilbert Descatiar, 24, uban ang nurse nga si Ceba Marie Bayno ug usa ka Michael Balabat.

Ang drayber sa multicab sa barangay Lamacan naila nga si Darcy Lopez, 41, taga Tongao, Argao ug sakay sab ang unom ka tawo ug usa niini nga nailha’ng si Elias Ramirez, 28, kinsa nakaangkon og samad sa baba.

Matud ni PO1 Dennis Cabajar, traffic investigator sa Carcar Police, nga gawas ni Ramirez gagmay ra og bun-og ang naangkon sa mga drayber, pasyente ug sa uban nga sakay sa duha ka sakyanan sa gobiyerno.

Gikan sa siyudad sa Sugbo ang multicab ug paingon pauli sa Argao samtang ang ambulansiya gikan sa Moalboal ug paingon sa dakbayan sa Sugbo aron maghatud og pasyente.

Pag-abot sa lugar nga nahitaboan kalit lang ni-overtake ang multicab sa usa ka traysikol nga naghunong sa karsada ug didto kini nibangga sa kasugat nga ambulansiya.

Sumala pa ni Cabajar nga halos sa mga sakay sa duha ka sakyanan nakaangkon og bukol sa ulo apan si Ramirez ang gikatahong gidali pagdala sa Vicente Sotto Memorial Medical Center kay nahingo ang usa ka ngipon niini.

Human sa hitabo gibalhin na lang sa lain nga sakyanan ang pasyente sa ambulansiya aron kini madayon og hatud sa tambalanan.  Hinuon gipasabot ni Cabajar nga lagmit magkasabot ra sab ang duha ka lokal nga opisyal sa barangay ug sa lungsod sa Moalboal, diin sila nagpaabot lang sab kung duna ba’y pormal nga mopasaka og kaso.  (BANAT NEWS)