PPDG ni Rama nakatabang sa siyudad

CEBU, Philippines – Ang Robinsons Mall maoy mopanindot sa kadalanan, sidewalk ug drainage palibot sa ilang gitukod nga bag-ong mall sa North Reclamation Area subay kini sa Public-Private Driven Governance ni Mayor Michael Rama ug tungod sa pagpugong sa P18.9 bilyones nga gipangayo niyang annual budget sa konseho sa dakbayan.

Nagkantidad og P25 milyones ang kinahanglanon sa maong proyekto nga naglakip sa pagsemento sa kadalanan nga palibot sa mall.

Matud ni Rama nga way gastos ang dakbayan sa maong proyekto nga tulo ka tuig na nilang gikasabotan sa presidente sa maong kompanya nga si John Gokongwei isip ilang corporate social responsibility.

Sumala pa nga subay sa ilang nasabotan, ang Robinsons maoy mogasto sa drainage system ug ingon man ang kadalanan palibot sa mall, apan ang siyudad maoy moabaga sa street lightings niini.

Gihulagway nga ang maong proyekto sa Robinson maisip nga pinaskohan alang sa mga taga Cebu.

Ang laing   proyekto nga gikalambigitan sa People Private Driven Governance mao ang Magellan’s Park.

Ang fountain nga gidonar ni Edward Hayco ug ang mga poste gikan sa Visayan Electric Cooperative nga nagkantidad og P1.5 milyones alang sa Cebu City nga adunay konsultasyon ug  pagtugot sa konseho sa dakbayan.

Samtang ang SM ni Henry Sy motabang usab sa pagtukod pagbalik sa Cebu City Medical Center nga giisip gihapon nga People-Private Driven Governance.

Gipasalig sa Project Operation Head Jaypee Allego nga mahuman ang pagbuhat sa dalan sa dili pa magsugod ang mga kalihokan sa Sinulog. (BANAT NEWS)