Brgy. Subangdaku mao gihapoy napili sa DILG

CEBU, Philippines – Ang Barangay Subangdaku sa dakbayan sa Mandaue  mao gihapoy  giila sa Department of Interior and Local Government (DILG) 7 isip “Most Gender Responsive” nga barangay sa dakbayan sa Mandaue sulod na sa ikatulong higayon.

Nunot sa maong pag-ila kanila sa DILG, hatagan sila og P70 milyones nga kantidad sa mga proyekto nga makatabang pa sa ilang mga molupyo. Gisundan ang Subangdaku sa ikaduha nga pwesto sa Barangay Canduman ug makadawat usab sila og P50 milyones usab nga proyekto. Ug ang ikatulo mao ang barangay Tabok  nga hatagan usab og P20 milyones nga kantidad nga proyekto.

Si Subangdaku Barangay Kapitan Ernie Manatad nga mao usab ang federation president sa Association of Barangay Council (ABC) sa maong dakbayan nagpasalamat nga nakita sa DILG ang paningkamot sa iyang barangay paghatag og papel sa  kabataan ug kababayen-an aron sila mahimong produktibo sa katilingban.

Ang barangay aktibo sa pagpahigayon og mga livelihood programs nga nahimong kaabag sa kababayen-an sa ilang pangita sama sa pagpanghimo og unlan gamit ang mga native materials ug mga recycled materials. (BANAT NEWS)