Radar sa DENR-7 moabot

CEBU, Philippines – Moabot karong buwana ang Ground Penetrating Radar sa Department of Environment and Natural Resources-7.

Matud sa tigpamaba sa DENR-7, Eddie Llamedo, nga importante ang maong radar tungod kay kini ang mokuha og imahe sa ilawom sa yuta.

Dugang ni Llamedo nga kun makuha na ang imahe, masayran na ang insaktong diameter sa usa ka lugar atol sa himuong assessment.

Nasayran usab nga kun moabot na ang GPR tutukan nila ang sinkhole nga nitumaw sa lungsod sa Badian nga padayu’ng nagkadaku ug dili gihapon stable ang sitwasyon sa yuta.

Lakip sa susihon sa DENR ang sinkhole sa isla sa Kinatarkan sa lungsod sa Sta. Fe.

Ang maong mga lugar mao’y tutukan sa ahensiya nga wala pa gyud matan-aw hangtud karon tungod kay wala’y igong kahimanan aron mohimo sa pakisusi.

Kahinumduman nga ang sinkhole sa Badian nitumaw human sa pagkuso-kuso sa bagyong Quennie. Pasabot sa Mines and Geo-sciences Bureau-7 sa maong sinkhole ang posible’ng humok nga yuta tungod sa sige og uwan mao nga nahunlak ug nakamugna og sinkhole. (BANAT NEWS)