CEBU, Philippines – Mokabat sa P300 mil ang gibilin nga danyos sa nasunog nga bodega sa Producer’s Feeds sa barangay Paknaan, dakbayan sa Mandaue alas 11:12 sa niaging Lunes sa gabii.
Si Senior Fire Officer 2 Cefriano Codilla Jr., field investigator sa Bureau of Fire Protection (BFP) sa maong dakbayan, niingon nga ang pagbunok sa kusog nga uwan sa niaging gabii wala gyud nakapugong sa pagkaylap sa kayo nga mao’y nakaaghat kanila sa pagpaubos sa Task Force Alpha sa maong sunog.
Dali nga nakatubag sa pagtabang kanila sa pagpawong sa kayo ang kabomberohan sa dakbayan sa Sugbo, Consolacion ug dakbayan sa Lapu-Lapu. Ang mga sakop sa Filipino- Chinese Volunteer Fire Brigade ug ang Emergency Rescue Unit Foundation (ERUF) ang dali usab nga nakatubag sa maong alarma. Si Fire Officer 3 Edwin Basirgo niingon nga unang nagsugod ang kayo taliwala sa bodega nga adunay mga sinakong feeds. Ang kayo dali kaayo nga ningkalap sa tibuok bodega hinungdan nga nalakip sa naugdaw ang usa ka Isuzu Crosswind nga service nga sakyanan sa pabrika. Matud ni Basirgo nga ang sunog hingpit nilang napawong human sa usa ka oras ug 33 minutos nga tinabangay sa pagpawong ug wala’y naangol o kinabuhi nga nakalas atol sa pag-ulbo sa kalayo. – /GMR) (BANAT NEWS)