13 patay kang Seniang

CEBU, Philippines – Trese ka tawo ang nangamatay ug 10 ang missing samtang upat ang naangol sa tropical depression Seniang nga padung na karong adlawa sa Palawan.

Sa pakighinabi sa mga tigbalita ni Regional Plans and Operations Chief sa Police Regional Office-7, Sr. Supt. Erson Digal mibutyag nga 13 na ka mga tawo ang gikatahong namatay gumikan sa bagyong Seniang.

Nabanlas

Si Digal miila sa mga nangamatay nga sila si Bienvenido Batomalaque, 58; Prudencia Ypanto, 89, Rancess Tampos, 5; Aaron Camillo, 7; Paul Emerson Lim, 17; Joan Bahinting, 8; Anabel Yap, 60, usa ka empleyado sa Sangguniang Bayan ug usa ka alyas Pew pew, 35; ug ang tanan gikan sa lungsod sa Ronda.

Samtang ang mga na-missing naila nga sila si Evelyn Bahinting, 40; Jun-jun Bahinting, 35; Jovelyn Bahinting, 10; Jean Bahinting, 5; Joyce Bahinting ug Ace Faunillan, duha pa ka bulan, nga gikatahong gibanlas sa kusog nga tubig baha samtang anaa sulod sa ilang balay sa Ronda, apil ‘sab ang laing pamilya nga sila si Leoning Caday, 50, Maribel Caday, 14, ug Jerly Caday ,11.

Didto sab sa Sibonga ang na-missing sila si Macaria Revilla, 66.

Sa lungsod sa San Francisco sa Isla sa Camotes, usa ka Joel Ostria, 30, nga milawod sa dagat aron mangisda niadtong Lunes apan gidagsa nga wala na’y kinabuhi sa Bokok Wharf sa Barangay Poblacion.

Sa Bohol

Samtang sa probinsiya sa Bohol duha ka tawo ang namatay human nakuryentihan sa Loon, Bohol. Sila giila nga sila si Archie Cambanay, 16, ug Arjay Brendes, 15.

Patay ‘sab si Paula Opay, 60, sa lungsod sa Baclayon human nalumos sa baha, natumbahan usab og lubi  si Carlo Dapito sa lungsod sa Alicia.

Si Ethel Natera, Public Information Officer sa Kapitolyo nagkanayon nga layo ra sa sapa ug sa baybayon ang balay sa mga biktima.

Apan kusog kaayo ang bul-og sa baha gikan sa bukid ug gibanlas ang ilang mga balay.

Kompiyansa

Sumala pa ni Allen Cabaron, ang Admin Support Division sa Office of the Civil Defense,  nga mas dako ang danyos nga gibilin si Seniang itandi ni Ruby.

Si Cabaron miingon nga  mikompiyansa ang mga tawo tungod kay panahon man sa Pasko ug ang kadaghanan nagpahimulos sa bakasyon ug naglipaylipay.

Matud niya daan na silang nagpadala og komunikasyon ug mga pahimangno ngadto na sa mga local disaster risk reduction councils bahin ni Seniang.

Ang grabeng pagbundak sa ulan ug ang hinay nga pag-irog  niini dala ang 55 kph nga hangin maoy nakaingon sa grabeng danyos nga gibilin sa mga rehiyon nga naagian ni Seniang.

Imprastraktura

Dunay mga nangagubang imprastraktura sama sa tulo ka mga taytayan, usa sa Bohol ug duha sa probinsiya sa Sugbo. Lakip sa nahugno ang usa ka bahin sa Transcentral Highway sa Balamban.

Si Natera mibutyag nga 15 ka lungsod sa probinsiya ang grabeng naapektohan sa bagyong Seniang.

Lakip sa maong mga lungsod ang Dalaguete, San Fernando, Tuburan, Oslob, Santander, Toledo, Consolacion, Ronda, Sibonga, Barili ug Balamban.

Sa lungsod sa Barili giingong dunay mga naguba nga foot bridges ug grabeng pagkadaot usab sa tulay sa Barangay Dumlog sa lungsod sa Sibonga.

Sa Bohol, gilapawan ang mga taytayan sa Abatan, Kamayan ug Anislag  ug dili pa kaagian sa mga sakyanan.

Dinhi sa Sugbo, ang Sariling sa Kilometer 163 dili ‘sab maagian, samtang ang Dumlog Bridge sa Sibonga naputol g’yud.

Si Digal miingon nga ang PRO-7 ang anaa gihapon sa heightened alert status ug duna sa’y ipahigayon nga search and rescue operation sa mga urban areas.

Ang OCD-7 mibutyag nga  62 ka mga barko ang wa makabiyahe ug kapin sa 7,000 ka mga pasahero ang natanggong sa mga pantalan sa rehiyon, samtang 12 ka mga flights ang gikanselar. – /EIM) (BANAT NEWS)