Mga barangay sa Toledo gibahaan
CEBU, Philippines – Nakahatag og kadaut sa dakbayan sa Toledo ang bagyong Seniang diin pipila ka barangay ang gibahaan tungod sa wala’y hunong nga pag-uwan ug kusog nga hangin nga nagsugod pa sa nakalabay’ng gabii.
Kapin sa 50 ka panimalay sa barangay Dumlog, Calong-Calong ug Matab-ang ang gibahaan diin kutob sa tuhod ang pagtaas sa tubig baha nunot sa pagsaka sa tubig sa mga sapa sa maong lugar.
Nisaka usab ang tubig sa sapa sa Dumlog nga maoy labing daku nga sapa sa dakbayan sa Toledo. Pipila na ka mga residente nga nagpuyo daplin sa maong sapa ang gipabakwit.
Gipabalhin na usab ang mga residente nga nagpuyo daplin sa dagat tungod sa dagkung hampas sa mga bawod.
May mga gihiklin usab nga mga residente daplin sa sapa sa Combado sa kasikbit nga lungsod sa Balamban. Samtang stranded ang kapin sa 600 ka pasahero sa Toledo City Terminal Port Area nga mopauli unta paingon sa San Carlos City, Negros Occidental. – /GMR) (BANAT NEWS)
- Latest
