CEBU, Philippines – Gumikan sa kahadlok nga madakpan, gipangbiyaan sa mga vendors ang ilang mga baligya nga ilegal nga pabuto human nakabantay sa mga nag-roving nga mga polis sa Capitol Site, dakbayan sa Sugbo sa nakalabay nga gabii.
Matud ni Chief Insp. Wildemar Tiu, hepe sa Fuente Police Station, nga nakadawat sila og impormasyon nga may nagbaligya og mga ilegal nga pabuto sa lugar.
Pasado alas 8 sa gabii sa may dalan J. Llorente, tulo ka lalaki ang dali nga nidagan human nakabantay sa kapolisan. Sa pagsusi sa kapolisan sa lugar, ilang nakita ang mga ilegal nga pabuto nga gipangbiyaan nga naglakip sa 40 ka fivestar, pito ka putos sa piccolo, walo ka gagmay nga box sa sparklers, usa ka box sa pilipao, usa ka gamay nga box sa pop-pop, 88 ka moon travelers ug 27 ka putos sa gagmay nga firecrackers nga mokantidad sa kapin P2,000. Dugang ni Tiu nga magpadayun sa pagpanikop ang iyang mga sakop sa mga gidili nga pabuto. – /GMR) (BANAT NEWS)