Lalaki gigapos, gi-salvage

CEBU, Philippines – Usa ka 20-anyos nga lalaki ang gituohang gi-salvage ug nakit-an na lang nga patay na nga may pinusilan sa iyang ulo daplin sa karsada sa Barangay Linao, Minglanilla kaniadto’ng Domingo sa kaadlawon.

Ang patay’ng lawas sa biktima nga si Jimmy Villanueva, taga Barangay Dawis, dakbayan sa Talisay, giila sa iyang mga ginikanan, matud ni PO1 Taher Radiab nga maoy desk officer sa Minglanilla Police Station.

Ang kapolisan miingon nga ang mga lumolupyo sa Barangay Linao napukaw sa ilang pagkatulog tungod sa duha ka lanog nga buto sa armas pasado alas 2 sa miagi’ng kaadlawon.

Sila si Julie Abatayo ug Eldebert Toribio maoy una’ng misusi sa lugar nga gigikanan sa lanog nga buto ug nakita nila daplin sa karsada ang nagbuy-od nga lawas sa biktima.

Gawas sa duha ka samad-pinusilan sa agtang nga naangkon ni Villanueva, gibinaklid pa gayud pagapos ang biktima gamit ang cable wire ug gituohan nga igo ra kini nga gidala sa mao nga lugar aron patyon.

Matud ni PO1 Radiab nga posible nga ang biktima gipik-ap sa laing lugar ug gidala didto sa Barangay Linao ug didto ra gipusil. – /RUB) (BANAT NEWS)