Napilde sa tari gi-atake, namatay
CEBU, Philippines – Gumikan sa kaguol nga napilde ang iyang manok sa sultada sa sabong, gi-atake sa kasingkasing ug namatay ang usa ka 55-anyos nga lalaki sulod sa buwangan sa St. Peter Coliseum, Ticad, Bantayan pasado alas 4 sa hapon niadtong nakalabay nga adlaw.
Ang namatay naila nga si Miguel Ducay, taga barangay Guiwanon sa maong lungsod.
Matud ni PO1 Joseph Dela Cerna, sakop sa alert team sa Bantayan Police Station, nga ang anak ni Ducay nga si Romel ang mitug-an sa kapolisan may labot sa maong hitabo.
Duha ka manok ang gidala ni Ducay sa buwangan ug nakadaug ang una’ng manok nga gitari.
Dihang gitari na sab ni Ducay ang iyang ikaduhang manok, iyang gihurot og pusta ang iyang daug sa una’ng manok apan demalas kay gibuno sa kontra.
Matud pa nga human sa sultada kalit lang nalipong ug nakuyapan si Ducay ug dali sab nga gidala sa Bantayan District Hospital apan nakabsan gyud sa iyang kinabuhi.
“Sa kaguol seguro to niya sir nga napilde siya kay midaug gyud siya sa una niyang manok,” sigun pa ni Dela Cerna.
Samtang si Dr. Allan Mercado niingon nga na-stroke o cerebrovascular accident ang naangkon ni Ducay hinungdan sa kamatayon. – /GMR) (BANAT NEWS)
- Latest
