Sugbo signal No. 1

CEBU, Philippines – Kapin sa napulo ka barko ug mga motor-banca ang wala mobiyahe gikan sa Sugbo kagahapon sa buntag tungod sa bagyong Seniang hinungdan sa pagkatanggong sa gibana-banang kapin sa 2,000 ka pasahero.

Base sa talaan sa Cebu Coast Guard Station nga 11 ka barko ug upat ka motorbanca ang gikanselar ang mga biyahe kagahapon sa buntag.

Ang maong mga sakyanan mobiyahe paingon sa dakbayan sa Ormoc, Calbayog, Dumaguete, Tagbilaran; Ubay, Tubigon, Bohol; ug Sibulan, Negros Oriental

Sa dakbayan sa Tagbilaran, Bohol, 10 ka barko ang gikanselar ang biyahe ug duha ka motor-banca diin kapin sa 1,000 ka pasahero nga paingon sa Sugbo ang natanggong.

Sa dakbayan sa Dumaguete, Negros Oriental, upat ka barko ug usa ka motorbanca ang gikanselar usab ang biyahe diin kapin sa 300 ka pasahero ang natanggong.

Base sa report sa Philippine Atmospheric, Geophysical and Astronomical Services Administration (PAGASA), ang bagyong Seniang gipaabot nga mo-landfall karong adlawa sa Tandag, Surigao del Sur.

Ang mga residente sa lupa ug bukid nga lugar nga ubos sa public storm signal #1 ang gialerto sa posibleng pagbaha ug pagdahili sa yuta.

Kagahapon sa alas 4:00 sa hapon ang sentro ni Seniang gibana-banang nahimutang sa 150 kilometros sidlakang bahin sa Hinatuan, Surigao del Sur.

Ang tropical depression Seniang duna’y gikusgon sa hangin nga 55 kilometer per hour (kph) duol sa sentro niini.

Si Seniang nag-irog kini sa kasadpan amihanang kasadpan sa gikusgon nga 13 kph.

Karong hapon si Seniang gibana-banang mahimutang sa 110 km amihanan amihanang sidlakan sa Lumbia.

Sa Martes ang bagyo gibana-banang mahimutang sa 100 km sa kasadpang bahin sa Dipolog City ug sa Miyerkules gibana-banang mahimutang kini 190 km habagatang sidlakan sa Puerto Princesa, Palawan.

Ang mga lugar sa Visayas nga gipaubos sa public storm signal #1 gilangkuban sa Leyte, Southern Leyte, isla sa Camotes, Cebu, Bohol, Negros Oriental, Negros Occidental ug Siquijor. – /GMR) (BANAT NEWS)