Gipulihan nga tigbantay sa manok nanunggab

CEBU, Philippines -  Grabeng naangol ang caretaker sa manok igtatari nga gidunggab sa iyang silingan sa barangay Casili, lungsod sa Consolacion alas 4 pasado ang takna sa hapon niadtong Lunes.

Si Police Officer 3 Arthur Ariate sa Consolacion Police Station miila sa biktima nga si Harmie Oporto, 28, ug ang suspek mao si Mario Adulfo Capallar, 49, nagpuyo usab sa maong dapit.

Matud pa ni Ariate nga kauban sa biktima ang lain nila’ng silingan nga si Junnie Momongan, 18, nga nagluto sa ilang panihapon sa luyo sa ilang panimalay dihang kalit lang mitumaw ang suspek nga nagdala og kutsilyo nga hubog ug nangutana kinsa ang isog.

Dugang ni Ariate nga gitug-an ni Momongan ngadto kanila nga tungod sa kalit nga pagtumaw sa suspek, wala dayun sila nakalihok hangtud nga giduol ang biktima ug gidunggab sa tiyan, dughan, abaga, baba ug lakip na sa bukton niini.

Si Momongan ang dali nga nakadagan ug nangayo og tabang sa mga silingan.

Ang suspek nga nakamatikod sa nagpadulong nga mga silingan ang dali nga nagpalayo ug mipaingon sa buhatan sa kapolisan aron pagtahan sa iyang kaugalingon.

Si Ariate miingon nga ang suspek nitug-an nga naghambin siya og kasuko sa biktima tungod kay mao kini ang nipuli kaniya isip caretaker sa mga fighting cocks nga iyang gibantayan sa maong lugar.(BANAT NEWS)