CEBU, Philippines - Nasikop sa pantalan sa dakbayan sa Sugbo ang 33-anyos nga lalaki gumikan sa pagdala og ilegal nga drugas sa Pier 1 kagahapon sa alas 8 sa buntag.
Ang dinakpan naila nga si Feliciano Ampong Jr., taga Poblacion II, dakbayan sa Tagbilaran, Bohol.
Matud ni Senior Insp. Alvin Merinillo sa Port Police nga paingon unta sa Tagbilaran ang suspek dihang nabantayan nga duna’y nagburot sa iyang bulsa.
Ila na lang giingnan si Ampong nga ipagawas ang anaa sa bulsa niini ug ibutang sa X-ray machine ug didto nakita ang duha ka dagku nga putos sa gituohang drugas nga gisulod sa plastic nga gibanabana’ng mokantidad sa P100,000.
Sumala pa ni Merinillo nga paingon na unta nga mosakay sa usa ka fastcraft si Ampong dihang nasakpan. Si Ampong niingon nga ang maong butang igo lang gipadala kaniya gikan sa iyang kanhi kauban sa trabaho.
Sigun pa ni Ampong nga igo lang siya giingnan sa iyang amigo nga tambal ang sulod sa maong plastic para sa iyang inahan sa Bohol.
“Wala ra man pud ko nag mind deritso ra pud ko diri, ako lang pod nga gisulod sa bulsa, pag frisking ana ingon to’ng sikyu nga ipatan-aw di ako po’ng gipatan-aw. Wala man ko’y huna-huna kung unsa na, akong huna-huna tambal na,” matud ni Ampong.
Nagmahay si Ampong sa hitabo apan nagdumili pagtug-an kung kinsa ang nagsugo.
Giangkon sa dinakpan nga tiggamitan siya og drugas kaniadto apan wala siya kasuway og pamaligya. (BANAT NEWS)