Manhunt vs Cop Killers
CEBU, Philippines - Motabang ang Regional Intelligence Branch (RID) sa Police Regional Office -7 alang sa dali nga kasulbaran sa pagpusil patay sa duha ka tulisan kang Police Officer 1 John Bryan Joseph Bazar didto sa Trinidad, Bohol.
Si PO1 Bazar nadestino sa Pari-an Police Station dinhi sa Cebu City Police Office giingong miduaw lang sa Bohol aron maghatud og pinaskuhan sa iyang mga ginikanan uban si PO1 Maryjane Bebiro dihang nahitabo ang krimen.
Si Senior Superintendent Pablo Labra II ang hepe sa RID mipadala na og mga sakop didto sa Bohol subay sa mando ni PRO-7 director Prudencio Bañas. Nasayran nga nagsakay ang duha og motorsiklo gikan sa Ubay padung sa Trinidad, apan pag-abot sa nahitaboan, gipatiran ang ilang motorsiklo sa duha ka tulisan nga nagmotor ug diretso nga gipusil si Bazar diha sa dughan.
Gikuha usab dayon sa duha ang bag ni Bebiro nga dunay kwartang P2 mil, mga ATM cards ug PNP ID niini. Wala ‘sab isalikway ang anggulo sama sa insurhensiya.
Ang OIC Chief sa CCPO nga si Sr. Supt. Conrad Capa ug mao sa’y deputy chief sa PRO-7 mipahimangno sa mga polis nga di kalimtan ang ilang kaugalingong seguridad.
Samtang usa ka mag-uuma nga si Freddie Navarro Bantillo, 61, gituohang gikawatan sa iyang binuhing baka ang napalgang patay ug giluglog ang liog niini sa kalibonan sa Barangay Pulang Bato, Dakbayan sa Bogo. (BANAT NEWS)
- Latest
