Nanghasi sa Misa

CEBU, Philippines – Nagubot ug nabalda ang Santos nga Misa sa Cebu Metropolitan Cathedral dihang usa ka 19-anyos nga lalaki ang misaka sa altar ug miambak nga nakapakurat sa mga manimbahay ug sa pari.

Ang gisikop naila nga si Reynald Ricaborda, taga Ozamis City nga giingong nagtungha dinhi sa taga Sugbo.

Matud pa ni Raul Guiñares ang team leader sa mga tanod sa barangay Sto. Niño nga nahinabi sa Banat News, nabulabog ang panapos na unta nga misa tungod sa gibuhat sa suspek. Giingong tarong kaayo kining misimba ug milingkod sa atubangan apan kalit lang kini midagan sa taas sa altar nga giisa ang kamot ug miambak sa altar.

Gidala kini sa barangay hall ug giingong nagsige ug  yawyaw og mga pulong nga gituohang “latin” ug kusgan ‘sab kini, nakuha sa iyang bulsa ang duha ka plastic nga duna’y sulod nga habak ug mga papel nga duna’y latin nga orasyon. Gitanggong na sa karsel sa Waterfront Police Station ang maong batan-on apan gibuhian kini dayon. Si Senior Police Officer 1 Aaron Pescadero ang desk office sa Waterfront Police mitug-an sa Banat News nga gibuhian ang batan-on  tungod kay Pasko na man. – /EIM) (BANAT NEWS)