CEBU, Philippines – Gibasura sa korte ang kasong indirect contempt batok nilang DyAB ug ABS-CBN Central Visayas broadcast journalist ug The Freeman/ Banat News columnist Leo Lastimosa ingon man si Atty. Pachico Seares, editor sa usa ka lokal nga pamantalaan.
Si Judge Raphael Yrastorza, Sr. kinsa maoy mipasaka og kaso sa duha miingon nga gipasanginlan siya sa duha nga bias pagkombikto kang Lastimosa sa kasong libelo nga gisang-at kang Lastimosa ni kanhi gobernador ug karon Kongresista Gwendolyn Garcia.
Apan gibasura niya kini human nawad-an na kini og interes sa paglabay sa panahon.
Niadtong Agosto 30, 2013, gikombikto si Lastimosa sa kasong libelo tungod sa iyang lindog nga Arangkada nga gipublikar sa The FREEMAN nga giulohan og “Si Doling Kawatan” niadtong tuig 2007.
Ang maong lindog naghisgot bahin sa usa ka lab-asera nga nakadaog sa politika ug kalit lang nadato, si Garcia miingon nga siya maoy gitumbok ni Lastimosa. Ang maong kaso anaa pa karon sa Court of Appeals.
Si Yrastorza kusganong mihimakak nga biased siya sa paghimo sa maong desisyon. Si Lastimosa ug Seares parehong mihimakak sa alegasyon sa huwes. – /EIM) (BANAT NEWS)