Duha ka bayot gidakop
CEBU, Philippines – Duha ka mga bayot ang gidakop sa mga sakop sa Fuente Police Station human sila gireklamo sa usa ka Korean national nga mikuha sa iyang mahalon nga cellphone sa dihang ang duha nakigsakay sa gisakyan niya nga taxi.
Ang mga dinakpan naila nga sila si Kenneth Padillo, 24, taga Sambag II ug Mark Incipido, 22 nga taga Looc dakbayan sa Mandaue, samtang ang mireklamo nga Koreano naila nga si Sung Ho Park, 24, nga temporaryong nagpuyo sa Barangay Kamputhaw.
Sa imbestigasyon sa kapulisan sa Fuente Police nasayran nga mipara og taxi ang langyaw gikan sa Mango Square apan giingong mihangyo ang duha nga manakay kay manaog lang sila sa B. Rodriquez, Sambag II.
Apan sa pag-abot sa langyaw sa iyang gipuy-an nawala na ang iyang cellphone nga Samsung S5 hinungdan nga nangayo kini og tabang sa kapulisan.
Sa gihimong followup operation nadakpan ang duha diha sa General Maxilom Avenue ug nabawi kanila ang cellphone nga positibong giila sa biktima nga iyaha, nakuhaan usab sila og drug paraphernalia. – /EIM) (BANAT NEWS)
- Latest
