Tulo ka kaso sa lungkab
CEBU, Philippines – Mokabat sa P100 mil nga kantidad sa salapi ug mga mahalon nga butang ang nadagit sa mga kawatan human giransak ang usa ka panimalay sa barangay Poblacion dakbayan sa Toledo. Si Engr. Romeo Aurena, 46, igo na lang sa pagsumbong sa Toledo City Police Station kalabot sa nahitabong pagpangawat.
Way tawo sa balay sa biktima atol sa hitabo maong gihakot sa mga kawatan ang iyang cash nga P100 mil, ug nagkalainlaing gadgets.
Samtang sa siyudad sa Bogo, nahanaw ang mga mahalong butang ug mga alahas sa usa ka dalagang guwang nga giila nga si Dinia Tequiloo Ursabia, 64, taga Barangay Tupaz. Ang biktima nisimba sa Misa de Gallo ug nakugang na lang pag-abot sa ilaha nga nagkagubot na ang iyang mga butang.
Nawala iyang mahalong gadgets, laptops ug mga alahas. Nasayran nga diha milusot ang kawatan sa bintana nga gitangtangan og bildo.
Sa laing bahin, nadakpan ang usa ka lalaki human kini naaktuhan nga nanglungkab sa usa ka balay sa Sitio Ilacot, Barangay Cotoco, lungsod sa Liloan nga giilang si John Michael Mendaros, 22, nagpuyo ra sa maong dapit. Gidemalas kini kay naaktohan sa tagbalay nga si Jovan Rey Amodia, 29, kinsa nakapangayo’g tabang sa mga tanod sa maong barangay. – /EIM) (BANAT NEWS)
- Latest
