CEBU, Philippines – Usa ka 31-anyos nga babaye ang nagpakitabang sa Talamban Police Station human nga giingong gitulis sa duha ka mga lalaking nag-helmet sa ubos sa skywalk sa Leyson Street, Talamban ug gisakiyo ang iyang P300,000 cash.
Ang biktima naila nga si Sheila Cordova Waters, nga nagpuyo sa Barangay Tawason, apan lumad nga taga Leyte.
Apan ang kapulisan nagduda kay atol sa gihimo nila nga imbestigasyon duna’y pamahayag ang biktima nga wala nagkatukma.
Matud pa ni Police Officer 2 Jud Jacquez sa Talamban Police Station nga nahinabi sa Banat News, way nakakita sa crime scene nga dunay komosyon nga nahitabo sa maong dapit nga pipila ra ka metros gikan sa police station.
Sumala pa nga giablihan pa sa tulisan ang bag sa biktima ug gikuot ang maong salapi, apan nahibulong sila kun nganong wa nangayo og tabang ang biktima nga daghan mang tawo sa maong dapit atol sa pagkahitabo.
“Makaduda kaayo, dili pud ta makaingon nga tulis me ni siya, kadtong kwarta daw gikan ‘to sa gawas para allowance niya,” matud pa ni Jacquez. – /EIM) (BANAT NEWS)