CEBU, Philippines – Duha ka lalaki ug usa ka babaye ang nalandig sa tambalanan human nangaigo sa saag nga bala sa managlahing insidente sa dakbayan sa Naga ug dakbayan sa Danao.
Ang mga biktima nailang si Jessa Mae Canonigo, 18, ug Raymond Sebial Obatay, 21, pulos residente sa Barangay Bairan, dakbayan sa Naga.
Sa inisyal nga imbestigasyon sa kapulisan, nasayran nga ang duha naglakaw daplin sa suba sa dihang nakadungog sila og buto sa armas gikan sa layo.
Mao na lay ilang namatikdan nga aduna na sila'y samad pinusilan. Si Canonigo nakaangkon og samad sa iyang walang aping samtang si Obatay sa iyang tuong tiil.
Daling gidala ang duha sa South General Hospital ug ang mga kawani na sa maong tambalanan ang mipahibaw sa kapulisan sa maong insidente.
Wala pa masayri kun saag nga bala ang nakaigo kanila o gituyo sila sa pagpamusil.
Mao na kini ang ikaduhang insidente sa saag nga bala sud sa nakalabay nga duha ka adlaw. Sa dakbayan sa Danao, usa ka Raymond Tapangan Cuenco, 26, residente sa Taytay, dakbayan sa Danao ang naigo og saag nga bala samtang nagpatuktok sa iyang manok. – /EIM) (BANAT NEWS)