Australian nangulata sa Mango

CEBU, Philippines - Gipaslak sa karsel sa Fuente Police Station ang Australian national human nakigsinumbagay sa Pinoy nga kostumer sa usa ka convenience store alas 2 pasado sa niaging kadlawon sa Mango Square, dakbayan sa Sugbo. Ang langyaw nga naila nga si Roberto Purcano, kasamtangang nagpuyo sa Basak, dakbayan sa Lapu-Lapu, nikulata ug nituok pa sa guwardiya sa Mino Stop Convenience Store. Ang nireklamo nga guwardiya naila nga si Edwardo Sala, 26, taga Cabancalan, Mandaue City.

Matud pa ni PO2 Philip Plasus, desk officer sa Fuente Police, nga hubog na ang suspek nga nisulod sa tindahan kay duna’y  paliton.

Apan nakakita hinuon og lalis sa usa ka kostumer sa tindahan ug nisangpot sa sinukmagay.

Ang guwardiya dali unta nga nibadlong apan mao na hinuon ang giatubang sa langyaw.

Ang ubang tawo sa lugar ang nitabang sa guwardiya ug dali nga nakatawag og tabang sa mga polis. Karong adlawa gikatakda’ng pasakaan og kaso’ng physical injuries ug drunkenness si Purcano. (Jojo C. Ugdol/GMR)(BANAT NEWS)