Sunog niulbo sa tisa

CEBU, Philippines - Naugdaw ang duha ka balay samtang usa ang partially damaged sa sunog nga niulbo sa sitio Capaculan, Tisa, Cebu City kagahapon sa buntag.

Mga bata nga nagduwa og posporo ang gitumbok nga hinungdan sa sunog alas 9:40 sa buntag sumala pa ni SFO3 Albert Jagdon, imbestigador sa Bureau of Fire Protection.

Taliwala sa kasudlonon sa lugar, nahimo gihapon sa kabomberohan ang pagkontrolar sa sunog sulod lang sa 10 minutos gikan sa pagdawat sa report pinaagi sa pagsumpay-sumpay sa mga hose.

Sa inisyal nga impormasyon, nagsugod ang sunog sa panimalay ni Jerry Ecunas sa duha ka andana nga balay.

Dali sab nga mikatap ang kayo sa King’s Apartment nga giabangan nila ni Bebe Largo ug Igan Pacquiao ug partially damaged ang duha ka andana nga balay ni Benito Caburay.

Gipasabot ni Jagdon nga ang hinungdan sa sunog padayon pa nga gi-imbestigar apan sa inisyal nga impormasyon, ang mga apo sa tag-iya sa balay ang gikatahong nagduwa og palito sa posporo. “Base sa pag-interrogate nato sa mga bata posporo ang ilang giduwaan posibleng maoy hinungdan ni sa sunog,” matud ni Jagdon.

Wala na’y nasalbar si Ecunas sa iyang mga gamit sa kadali sa pagdaku sa kayo.

Tanan nilang kinitaan ug mga importanteng dokumento ang apil sa gikaon sa kayo lakip na ang usa ka motorsiklo.

Sigun sa banabana sa kabomberohan muabot sa P80,000 ang danyos sa sunog. (Jojo C. Ugdol/GMR)(BANAT NEWS)