CEBU, Philippines - Nagtingkagol sa bilanggoan sa Samboan Police Station ang magsuon nga nakig-sinukmagay sa tulo ka polis human gibadlong sa pagpanguha og bas sa barangay Suba pasado alas 10 sa buntag sa nakalabay nga adlaw.
Ang mga dinakpan naila nga sila si Niko Tulod Encarquez, 18, ug Ryan Encarquez Tulod, 22, pulos nagpuyo sa maong lugar.
Gisusi nilang PO3 Johnny Marquiño, PO1 Serge Hiramis ug PO1 Jason John Hiramis ang giingong ilegal nga pangubkob sa bas ug sa suba sa maong lugar.
Sa pag-abot sa mga polis, unang niduol si Jason sa magsuon ug nangayo og papeles sa pagpanguha og bas apan wala’y gipakita hinungdan nga gibadlong.
Apan imbis mopatuo, nangasuko ang magsuon ug nangasaba pa sa polis.
“Giingnan naman hinuon ang atong kauban sir nga salig ka nga polis? Hambugero kaayo mo, nganong badlong badlong man ka?” sigun pa ni PO2 Ressel Jabagat.
Atol sa tinubagay kalit lang gituok ni Niko ang polis hinungdan nga daling niresponde ang duha ka kaubang polis samtang nilaban ang igsuon ug nahitabo ang komosyon. Ang mga ginikanan sa magsuon ang misuway pa unta og pakilooy sa mga polis apan wala magsilbi.
Gitug-an ni Jabagat nga daghan sab nga residente sa lugar ang ilegal nga manguha og bas gumikan kay nahimo na sab kini nila nga panginabuhian diin matag sako ilang ibaligya sa tag P40.
Kaso’ng paglapas sa municipal ordinance batok pagpanguha og bas ug kasong direct assault ang gikatakdang ipasaka batok sa duha ka magsuon karong adlawa. (Jojo C. Ugdol/GMR)(BANAT NEWS)