CEBU, Philippines - Mitungha niadtong Martes sa hapon ang iyaan sa menor de edad nga babaye kinsa nalambigit sa kontrobersiya sa Sugbo.
Matud sa hepe sa Provincial Social Welfare and Development (PSWD) nga si Rose Jao miuban sa ilang iyaan niadtong Martes ang 18-anyos nga maguwang sa menor nga dinhi ra magpuyo sa Sugbo.
Ang tumong lang sa pagpatungha sa iyaan sa menor aron dunay mubarog nga guardian niini subay usab sa suwat gikan sa amahan niini nga ang duha maoy mokustodiya kaniya.
Ang maong menor gibalhin ngadto sa laing pasilidad nga ubos sa pagdumala sa Department of Social Welfare and Development (DSWD) apan dili pa kini tugotang makabalik ngadto sa Leyte tungod kay daghan pa’ng mga dokumento ang ilang iproseso ug gawas niini wala pay resolusyon gikan sa piskaliya nga siya pabuhian.
Matud ni Jao nga ang maong menor nagkinahanglan usab kining mobutang og piyansa tungod kay napasakaan kini og laing kaso sa lain usab nga reklamante.
Kinahanglan pa usab kining mopaubos sa “psychosocial process” ug ideterminar pa nila ang resulta sa maong eksaminasyon.
Ug kung mahuman na ang legal procedure una pa mabalhin ang maong menor ngadto sa DSWD sa Leyte ubos sa superbisyon sa iyang ginikanan.
Bisan buot sa menor nga makauban sa Pasko ang iyang pamilya, apan si Jao di makapasalig niini tungod kay ipaubos pa siya sa mga proseso. (BANAT NEWS)