Bagyong Ruby nagbilin P238M danyos

CEBU, Philippines – Mikabat sa sobra sa P238 milyones ang gibiling danyos sa bagyong Ruby sa imprastraktura ug agrikultura sa probinsiya sa Sugbo sumala pa sa Provincial Public Information Office.

Sa talaan sa kagamhanan sa probinsiya kapin sa P113 milyones ang danyos sa imprastraktura ug kapin sa P125 milyones sa agrikultura.

Ang 34 porsiyento sa danyos naggikan sa dakbayan sa Bogo diin mikabat ngadto sa P81.3 milyones ang danyos sa tulay ug karsada.

Gawas niini mikabat sa sobra sa P7.7 milyones ang danyos sa government buildings ug mikabat sa kapin sa P700 mil ang danyos sa school buildings ug kapin sa P7.9 milyones ang danyos sa agrikultura.

Ang mga  lungsod nga nakaduso sa kantidad sa danyos mao ang Borbon, Carmen, Daanbantayan , Madridejos, Pilar, San Francisco, San Remegio ug  Santa Fe .

Ang mga lungsod sa Catmon, Compostela, Liloan, Bantayan, Medellin, Poro, Sogod ug Tuburan wala pay nasumiti nga danyos sa bagyo. Ang public information officer (PIO) sa probinsiya nga si Ethel Natera nagkanayon nga ang maong datos maoy ilang himuong basehan sa ‘response plan” kung unsay matabang sa kagamhanan sa probinsiya ug sa ubang ahensiyang hingtungdan ngadto sa mga kalungsuran nga naapektohan sa bagyo. – /EIM) (BANAT NEWS)