CEBU, Philippines – Patay ang managkapuyo human napasok sa 10-wheeler truck ang ilang gisakyan nga motorsiklo diha sa Barangay North Poblacion, lungsod sa San Fernando.
Ang mga biktima naila nga sila si Samuel Alcomendras, 35, taga Poblacion 1, dakbayan sa Carcar ug si Soraya Montillano, taga dakbayan sa Ozamis, Misamis Occidental, samtang drayber sa trak naila nga si Reynante Quisagan, 34, taga Balud, San Fernando.
Sumala pa ni SPO1 Francisco Salubre ang imbestigador sa San Fernando Police nga nahinabi sa Banat News, gikan sa siyudad sa Sugbo ang duha paingon unta sa dakbayan sa Carcar, samtang gikan sa San Fernando ang trak. Sigun pa ni Salubre nga pag-abot sa maong lugar kalit lang mi-overtake ang trak sa nag-una niini nga sakyanan apan nakasugat niini ang motorsiklo sa mga biktima hinungdan sa pagkapasok nila sa ilawom niini. Maayong pagkagupok sa mga biktima ug nangabuak ang ilang mga helmet tungod sa impact.
Ang drayber sa truck nga nahinabi ni Salubre mialegar nga wala niini nabantayan ang motorsiklo kay wala kini suga. “Iyaha pud na nga pasangil, wala daw suga pero hayag man ang lugar kay naa pa man na sa Poblacion, dili ‘sab na kurbada,” dugang pamahayag ni Salubre.
Gidala sa Carcar Provincial Hospital ang duha apan patay na kini nga naabot sa tambalanan. Ang babaye gikatahong bag-ohay lang milukat og ticket aron unta mopauli sa Ozamis City. – /EIM) (BANAT NEWS)