Drayber gipatay sa iyang pasahero
CEBU, Philippines – Patay dihadiha ang usa ka drayber sa traysikad human kini gipusil sa makadaghang higayon sa iyang pasahero diha sa Bliss Street, Sitio Bonbongan, Barangay Labangon ning dakbayan sa Sugbo.
Ang biktima naila nga si Roy Jarita, 42, nagpuyo sa maong lugar kinsa nakaangkon og daghang samad pinusilan sa kalawasan.
Matud pa ni Senior Police Officer 1 Ruth Violango ang imbestigador sa Homicide Section sa Cebu City Police Office (CCPO) nga nahinabi sa Banat News misakay ang mamumuno sa biktima.
Giingong nadunggan ang mamumuno nga militok og: “utangan man ko nimo atong bagyo bai no?” ug mihatag kini og kwarta sa biktima nga gidawat ra usab niini. Apan sa pagdagan na sa traysikad usa ka gatos ka metros gikan sa parkingan, kalit nga nadungog ang sagunson nga buto sa armas ug nakit-an ang pasahero nga mikanaog ug miangkas sa nagsunod nga motorsiklo dayong ikyas palayo.
Nagtuo si Violango nga personal nga bikil ang motibo sa maong pagpatay, apan nasayran sa kapolisan nga way nakaaway ang biktima sa maong dapit. Apan duna silay nakuha nga impormasyon nga usahay magbagulbol ang biktima kung duna’y pasahero nga kuwang ang ibayad nga pleti.
“Siya ra man gud nagbuhi sa iyang mga pag-umangkon mao nang gusto g’yud niya sakto ang pleti sa mga pasahero kay naa man siya’y gastuhan,” sigun pa ni Violango. – /EIM) (BANAT NEWS)
- Latest
