CEBU, Philippines – Maghugop karong kaadlawon sa tanang mga simbahan sa nasud ang minilyon ka mga Filipino alang sa tradisyonal nga “Misa de Gallo” nga molanat og siyam ka adlaw ug tapuson sa Disyembre 24, bisperas sa Pasko. Tungod niini, ipaubos sa heightened alert ang seguridad sa dakbayan sa Sugbo sugod karong adlawa. Ang kapolisan magbutang og daghang checkpoints sa kadalanan samtang ipakatap usab ang mga tanod sa barangay, paramedics ug ang disaster management personnel aron moabag sa hapsay, malinawon ug luwas sa mga manimbahay.
Duna unyay ibutang mga public assistance centers sa nagkadaiyang simbahan ingon man sa merkado, malls ug uban pang lugar nga dunay daghang tawo aron dunay kadangpan kun gikinahanglan.
Gipasidan-an usab ang katawhan nga mag-amping sa ilang mga balay tungod sa mga kawatan nga posibleng naghuwat lang sa pagbiya sa mga tagbalay.
Si Cebu City Councilor Dave Tumulak nagkanayon nga walay vacation leave ug day off ang mga tanod ug kapolisan aron magbantay ug mag-roving sa mga kadalanan.
Magpabilin ang maong sitwasyon sa seguridad sa dakbayan hangtud sa pagsaulog sa Sinulog ug International Eucharistic Congress sa sunod tuig
Nanawagan usab si Tumulak nga likayan ang paggamit og pabuto karong umaabot nga Pasko ug Bag-ong Tuig aron makalikay sa disgrasya. – /EIM (BANAT NEWS)