CEBU, Philippines – Magpirmahay og kasabutan ang Kapitolyo ug ang bus ug mini operators alang sa pagpatuman sa pagpa-ubos sa pletehan.
Ang hunta probinsiyal sa Sugbo pinaagi sa giduso nga resolusyon ni Bokal Thadeo Ouano nihatag og katungod kang Gob. Hilario Davide III sa pagpirma sa maong kasabutan.
Ang mopirma sa habig sa mga operators mao sila si Richard Corominas, presidente sa Cebu Provincial Bus Operators Association (CPBOA) ug Julieto Flores, presidente sa Cebu South Mini Bus Operators Association (CSMBOA).
Gibasehaan sa pagpakunhod sa pletehan ngadto sa P5 sa unang lima ka kilometros ug P1 sa matag mosunod nga kilometro mao ang sagunson nga pagminus sa presyo sa produktong petrolyo sukad pa niadtong 2011 sumala pa ni Ouano.
Matud ni Ouano nga niuyon na ang mga grupo sa mga operators nga minusan ang pletehan. – /GMR) (BANAT NEWS)