PWD ug Senior Citizen malipayon

CEBU, Philippines - Dugangan sa dakbayan sa Mandaue ang financial assistance nga ipanghatag ngadto sa mga rehestrado’ng Persons with Disability (PWD) ug mga Senior Citizens sa siyudad.

Ang mga PWD sa Mandaue nagdawat unta og ‘tag P500 nga cash assistance sa tibuok tuig, apan karong tuiga nahukman nga dugangan kini og himuon na nga P1,500. Samtang ang mga senior citizens nga ‘tag P2 mil kada usa, himuon na nga P3 mil. Si Mandaue City treasurer Regal Oliva miingon nga ang dugang financial assistance adto kini kuhaon sa one percent sa annual budget karong tuiga nga base sa balaud alang gayud sa mga senior citizens.

Ang giaprobahan nga paghimo’g kausaban sa ordinansa naglatid nga ang mga senior citizens sa Mandaue makadawat og P1,500 isip mid-year bonus ug sa Disyembre ilang madawat ang laing P1,500.

Si Konsehal Diosdado Suico, chairman sa committee on budget, maoy miduso sa  ordinansa nga nagtugot sa paghatag og usbaw nga cash assistance sa 14,000 kapin nga senior citizen ug mga PWD sa Mandaue. (BANAT NEWS)