Duha gitigbas ug gipusil samtang nangatulog

CEBU, Philippines - Duha ka lalaki nga maayong pagkahinanok gipusil ug gitigbas sa buwag nga hitabo sa lungsod sa Asturias ug sa Barangay Tisa, dakbayan sa Sugbo.

Si Johnry Garbo, 28, taga Barangay Owak, Asturias natulog lang sulod sa iyang balay nga nahimutang sa Sitio San Miguel diha nga adunay mga tawo nga misaka ug gipusil ang biktima kaniadtong miaging kaadlawon.

Wala na madala pa sa ospital ang biktima tungod kay nakabsan kini sa kinabuhi human g’yud sa pagpamusil kaniya.

Si PO3 Dandreb Lambo, desk officer sa Asturias Police Station, miingon nga wala pa silay lead sa pagpatay sa biktima. Wala pa sa’y kasayuran ang kapolisan kun kinsa ang mipusil ni Garbo kay ang iyang balay layo ra sa mga silingan.

Wa ‘sab makabantay ang mga silingan kun pila ang mihimo sa krimen. Nakuha sa kapolisan ang lima ka kabhang ug tulo ka slugs sa bala sa kalibre .45 nga pistola ug usa ka slug sa bala sa 9mm nga pistola

Samtang sa laing hitabo, gitigbas sa usa ka babaye ang iyang kapuyo samtang kini natulog kagahapon sa buntag didto sa ilang panimalay sa Sitio Cabrete, Barangay Tisa, dakbayan sa    Sugbo.

Ang biktima nga si Edmundo Mabag, 40, maayo nga pagkahinanok dihang gitigbas sa kapuyo niya nga si Florencia Ceranillo nga naghambin diay og pagdumot kaniya kay kanunay sila nga maglantugi.    

Si Mabag nakaangkon og samad sa tuo nga bahin sa iyang liog ug anaa karon sa Cebu City Medical Center (CCMC). Base sa pasiuna nga imbestigasyon sa kapolisan nasayran nga magsige lang og lantugi ang biktima ug ang iyang kapuyo tungod sa dugay na nga selos ug mao’ng niresulta kini sa pagpanigbas.

Ang suspetsado gitanggong sa kapolisan apan gibuhian ra usab dayon tungod kay walay tinguha nga mopasaka og kaso ang biktima. (Bryner Diaz ug Lorelyn D. Dechos ug Jean Lumpas USJ-R Interns/RUB) (BANAT NEWS)