CEBU, Philippines – Dul-an sa P270 mil ang kantidad sa mga alahas, butang ug kwarta ang nadagit sa manglungkabay gikan sa usa ka panimalay sa sityo Kapasad, Dumlog, dakbayan sa Toledo.
Gipanag-iya sa usa ka Alan Borja, 54, usa ka negosyante ug ig-agaw ni Konsehal Antonio Borja.
Nasayran nga wala sa panimalay ang biktima dihang nahitabo ang pagpangawat kay may importante nga gilakaw.
Pagbalik niini nadiskobrehan na lang nga nagkatag na ang mga gamit ug ubang butang sulod sa panimalay.
Nakuha ang tulo ka alahas nga kwentas nga bulawan, iPhone 4, Samsung ug Myphone nga cellphones, mahalon nga relo, 10 ka mahalon nga karsones ug P2,000 nga kwarta.
Nagduda ang kapolisan nga suhito ug dugay na’ng naniid ang kawatan kun mobiya sa panimalay ang biktima.
Nunot niini nipahimangno si Supt. Ricky Delilis, hepe sa kapolisan sa Toledo, ngadto sa publiko nga magmabinantayon ilabi na panahon sa Pasko. – /GMR) (BANAT NEWS)