CEBU, Philippines – Mokabat sa P125,000 ang natala nga danyos sa duha ka managlahing sunog sa Mabolo, dakbayan sa Sugbo sa niaging kadlawon ug sa Isla sa Bantayan sa nakalabay nga adlaw.
Ang mga panimalay nga gipanag-iya ni Pia Bontuyan ug sa iyang paryente nga si Esterlita Bontuyan ang gikaon sa kayo sa Tres Borces, Mabolo alas 3:22 sa niaging kadlawon.
Matud pa ni SFO3 Danilo Relatado, fire investigator sa Cebu City Fire Department, nga nagsugod ang kayo sa kisame sa balay ni Pia gumikan sa electrical misuse ug kay hinimo ra man sa kahoy dali kaayo nga mikatap sa tapad nga balay.
Gibanabana nga mokabat sa P50,000 ang nabilin nga danyos sa maong sunog.
Samtang ang panimalay sab nila ni Fedila Rivera ug sa bayaw nga si Cristobal Giducos Jr., ang nahiagum sab og partial nga danyos human niulbo ang kayo sa ilang balay sa barangay Suba, Bantayan, niadtong Domingo sa gabii.
Naapil sa pagkasunog ang duha ka motorsiklo nga giparada sa gawas sa panimalay ni Giducos nga gipanag-iya sa iyang ig-agaw.
Gitug-an ni SFO3 Jose Maliban Jr. nga nagsugod ang kayo sa lawak ni Rivera.
Gibanabana sab nga moabot sa P75,000 ang nahimong danyos niini. – /GMR) (BANAT NEWS)