Modular type ang ipatukod ni Sanchez
CEBU, Philippines – Tinguha ni Bokal Grecilda Sanchez nga matukod ang Cory Aquino Modular Type nga mga school buildings ilabi na sa mga lugar nga pabor kaayo sa kuso-kuso sa bagyo.
Ang modular type nga building sama kini og porma sa “Igloo” o puy-anan sa mga Eskimo nga ginama sa semento gawas sa iyang bintana ug pultahan.
Matud ni Sanchez nga gibuhi lang niya ang plano sa iyang amahan kaniadto nga si anhing bise gobernador Gregorio Sanchez sa pagpatukod og mga modular type building sa mga eskwelahan sa probinsiya.
Si Sanchez nanawagan sa Department of Public Works and Highways (DPWH) ug Department of Education (DepEd) ug sa mga pribadong sektor nga partner sa maong mga ahensiya nga ikonsiderar ang pagtukod og Cory Type Modular School Building.
Si Sanchez nagkanayon nga dunay mga classroom sa ubang eskwelahan sa probinsiya nga Modular Type nga mao lang ang wala naguba sa bagyong Yolanda ug Ruby.
Matud ni Sanchez nga ang gobiyerno makaluwas sa gasto ug pagtukod og mga school building human sa katalagman kung Modular Type nga building ang tukuron.
Ang mga tunghaan maoy himuong bakwitanan kung dunay moabot nga bagyo ug kinahanglang lig-on. Dugang ni Sanchez nga kasagaran sa mga eskwelahan sa probinsiya kuwangan pa og mga classroom ug nanghinaut siya nga Modular Type building ang tukuron. – /GMR) (BANAT NEWS)
- Latest
