Bonus sa mga kawani sa City Hall approve na

CEBU, Philippines – Sigurado na nga makadawat og ‘tag P10 mil nga bonus ang kada usa ka opisyal ug kawani sa Cebu City Hall human nga giaprobahan sa mga konsehal ang Supplemental Budget No. 3 nga giduso ni Mayor Michael Rama.

Ang Cebu City Council miingon nga ang bonus kinahanglan nga ihatag sa dili pa ang Pasko. Si Mayor Rama nalipay nga giuyonan sa mga konsehal ang gisugyot niya nga bonus ug miingon nga nagpaabot gani siya nga dugangan ang kantidad sa konseho.

Sa miaging tuig, ang matag opisyal ug kawani gipanghatagan og ‘tag P20 mil apan wala gibutang nga bonus, kondili gibutang kini nga calamity financial assistance tungod sa linog ug sa bagyo’ng Yolanda nga maoy hinungdan nga nag-atubang og kaso sila si Mayor Rama ug kaubanan.

Ang ubang mga kawani sa City Hall ingon sa gigamyan sa ‘tag P10 mil nga bonus tungod kay nagpaabot sila nga ang ipahatag kanila ni Mayor Rama ‘tag P15 mil.

Apil sa makadawat sa ‘tag P10 mil nga bonus mao si Rama, Bise Mayor Edgardo Labella ug ang tanang mga konsehal.

Sa laing bahin, si Atty. Reymelio Delute midemanda ni Rama nga ihurot paghatag ang nahabilin nga P5 mil nga balanse nga cash assistance alang sa matag senior citizens.

Si Delute mao ang abogado nga mikiha ni Rama didto sa Malacañang tungod sa pagpanghatag ‘tag P20 mil sa matag opisyal ug kawani sa City Hall isip calamity assistance sa miaging Disiyembre.

Karong tuiga ‘tag P12 mil ang gisaad nga cash assistance sa mga senior ug P7 mil pa lang ang ilang nadawat. Gusto ni Delute nga ihatag ang nahabiling P5 mil sa dili pa ang Disyembre 31, apan si Rama dili makapaneguro. (BANAT NEWS)