CEBU, Philippines – Gikatakdang duawon ni Cebu City Mayor Michael Rama ang mga lugar sa Eastern Samar nga grabeng naapektuhan sa Bagyong Ruby aron susihon kun unsay matabang sa dakbayan kanila. Mao usab kini ang gibuhat sa siyudad sa miaging tuig dihang naigo sa bagyong Yolanda ang Kabisay-an, ang dakbayan mihatag og P12 milyones nga financial assistance sa mga naapektuhang local government units sama sa Tacloban City ug Ormoc City ug uban pang kalungsoran.
Tan-awon usab kun hinabang pinansyal o mga gamit ang gikinahanglang ipadala sa dakbayan.
Sa laing bahin, gipangunayan ni Rama ug Vice Mayor Edgardo Labella ang pagsuroy sa mga eskuylahan nga gihimong evacuation centers sa dakbayan aron pagsusi sa pagpanglimpyo niini aron magamit sa klase sa mga bata.
Matud ni Konsehal Dave Tumulak, kinsa mao usab ang chairman sa Cebu City Disaster Risk Reduction Management Council, nakab-ot sa siyudad ang “zero casualty” ilabi na gikan sa mga coastal barangays.
Apan dunay nakit-ang kinahanglang palambuon pa sa mga evacuation centers, kini sama sa seguridad nga unta kaakohan sa mga barangay officials.
Kini human dunay insidente nga gipangawat sa pipila ka evacuees ang mga gamit sa mga eskuylahan nga ilang gipasilongan. Nasayran nga miabot og 40 mil ka evacuees ang nipasilong sa 137 ka mga evacuation centers sa siyudad, silang tanan luwas na nga nakabalik sa ilang mga barangay.
Giawhag ni Tumulak ang katawhan nga adunay libreng tawag sa SMART ug SUN nga nahimutang sa City Hall aron mapahibalo ang ilang mga kabanay sa gawas sa nasud o sa bisan asang dapit sa Pilipinas. Samtang si Mayor Johnny Delos Reyes sa siyudad sa Talisay miingon nga dako og natampo ang pagbakwit sa mga Talisaynon nga nagpuyo sa mga peligrosong dapit nga humok maigo sa storm surge, landslide ug pagbaha.
Si Delos Reyes uban sa action officer sa City Disaster Risk Reduction Management Council Vince Monterde miadto sa Barangay Manipis aron ipadayon ang paghatag og mga hinabang sa mga molupyo nga mibiya atol sa bagyo. – /EIM) (BANAT NEWS)