Daghan pang barko ang wa makabiyahe

CEBU, Philippines – Bisan pa man kun gilibkas na ang mga public storm signal sa Northern Cebu, Cebu City ug Southern Cebu tungod sa bagyong Ruby, daghan gihapong mga barko ang wa pa makabiyahe  kagahapon.

Gitug-an ni Commander Weniel Azcuna ang Chief of Staff sa Philippine Coast Guard Visayas  nga kadto lang mga barkong lapas og 250 gross tons ang gitugotan pa nga makabiyahe.

Ang Philippine Coast Guard mipahimangno sa mga gagmay nga barko ilabi na ang mga gagmay’ng panagatan nga dili una molawig kay duna pay gipagawas nga gale warning ang buhatan sa PAGASA.

Samtang daghan pa usab nga mga barko ang wala pa makabalik sa Sugbo gikan mitago sa ilang mga shelter area sama sa Dipolog ug uban pang bahin sa Mindanao aron makalikay sa bagyo. Aduna na hinoon pipila ka mga barko sa habagatang bahin sa Sugbo, sama sa Bato-Liloan nga paingon sa Negros Oriental nga nakalawig na ug nakahatud na sa ilang mga pasahero.

Ang mga barko nga gikan sa Manila padulong sa Sugbo, pabilin pang na-stranded sa kaulohan sukad niadtong Huwebes, hinungdan nga gipanglantawan nga sa Miyerkules o sa Huwebes pa adunay biyahe gikan sa Sugbo padung sa Manila.

Hinuon, walay natala ang coast guard sa Kabisay-an nga adunay mga nadisgrasya o na-missing sa kadagatan sa Visayas tungod sa bagyo. – /EIM) (BANAT NEWS)