Ruby padung na sa Luzon

CEBU, Philippines - Nakagawas na sa Sugbo ang bagyong Ruby sumala pa sa Philippine Atmospheric Geophysical and Astronomical Services Administration (PAGASA).

Base sa weather bulletin sa alas-5 sa hapon kagahapon, ang bagyong Ruby mag-landfall sa ikatulong higayon karong adlawa (Lunes) tunga-tunga sa alas 2:00-4:00 sa kaadlawon sa Sibuyan Island. Magdala gihapon kini og kusog nga hangin, ug posibleng dunay storm surge nga masinati sa pipila ka mga lugar ug magdala kini og kusog nga uwan.

Sa alas 4:00 sa hapon kagahapon ang mata ni Ruby nahimutang sa 20 km (kilometers) sa kasadpang bahin sa Masbate City, Masbate o sa Aroroy, Masbate. Ang gikusgon sa hangin ni Ruby miubos kini ngadto sa 140 kph (kilometer per hour) duol sa sentro ug muabot ngadto sa 170 kph ang gikusgon sa unos ug nag-irog kini sa kasadpan- amihanang-kasadpan sa gikusgon nga 10 kph.

Ang mga lugar nga gipaubos sa public storm signal #3 gilangkuban sa Masbate, Ticao Island, Burias Island, Marinduque, Romblon ug Oriental Mindoro.

Ang mga lugar nga gipaubos sa public storm signal #2 gilangkuban sa Sorsogon, Albay, Cavite, Laguna, Batangas, Lubang Island, Quezon, Occidental Mindoro, Camarines Norte, ug Camarines Sur.

Lakip sa gipaubos sa public storm signal #2 gilangkuban sa Northern Samar, Samar, Biliran, Aklan, Capiz, Northern Cebu lakip ang Cebu City, Bantayan Island ug Camotes Island. Ang mga lugar sa Luzon nga gipaubos sa public storm signal #1 gilangkuban sa Zambales, Bataan, Nueva Ecija, Tarlac, Pampanga, Bulacan, Metro Manila, Rizal, Catanduanes ug Northern Palawan.

Samtang ang mga lugar sa Visayas nga gipaubos sa signal #1 gilangkuban kini sa Iloilo, Antique, Guimaras, Negros Occidental, Negros Oriental, Eastern Samar, Leyte, Southern Leyte ug ubang parti sa Sugbo. Karong hapon (Lunes) si Ruby gibanabanang mahimutang sa 60 km sidlakang bahin sa Calapan City, Oriental Mindoro o 160 km habagatang bahin sa Quezon City. Sa Martes sa hapon, si Ruby gibanabanang mahimutang sa 170 km habagatan kasadpan sa Science Garden sa Quezon City ug sa Miyerkules sa hapon mahimutang sa 400 km kasadpang bahin sa Science Garden, Quezon City.

Si Ruby gilaumang mogawas sa Philippine Area of Responsibility (PAR) sa Huwebes sa buntag. (BANAT NEWS)