Hinabang sa mga senior citizen sa Toledo ipanghatag na
CEBU, Philippines - Ang kadagkoan sa Toledo City Social Welfare Development Office mipahibalo nga ipanghatag na ang gisaad nila nga cash incentives sa mga senior citizens isip pinaskohan.
Si Mae Tacandong sa Social Welfare and Development Office miingon nga ila na nga giandam ang payroll alang sa pag-release sa cash assistance. Si Toledo City Mayor John Henry Osmeña daan na nga mipahibalo nga ang matag senior citizen sa Toledo makadawat og ‘tag P2,500 karong paskoha.
Adunay 38 ka chapters ang mga senior citizens association sa dakbayan sa Toledo nga kuwalipikado nga makadawat sa mao nga cash assistance.
Sanglit ang pagpanghatag adto man himoa sa kabarangayan, ang mga seniors dili na kinahanglang moadto pa sa opisina sa CSWD ug sa Office of the Senior Citizens Affairs (OSCA) aron pagkolekta.Tumong ni Osmeña nga adto sa kabarangayan ipanghatag ang cash assistance aron dili na mahasol ang mga tiguwang. Base sa talaan sa OSCA ang Toledo adunay 12,400 ka senior citizens. (BANAT NEWS)
- Latest
