CEBU, Philippines - Tricycle driver gipusil patay samtang napagan ang usa ka bombero hinungdan sa pagkaangol niini sa nahitabong pagpamusil sa Pajac Proper, Barangay Pajac dakbayan sa Lapu-Lapu.
Ang namatay mao si Gerry Soreño, 50, taga Sitio Mahayahay, Barangay Bankal human kini gipaulanan og bala sa tulo ka mga lalaking nag-motor. Samtang napagan ang bombero nga si Teotimo Vallar, 42, nadestino sa Lapu-Lapu City Fire Department
Base sa imbestigasyon ni Senior Police Officer 1 Allan Pantaleon sa Lapu-Lapu City Police Office-Homicide Section padulong sa Barangay Pajac ang biktima gikan sa Barangay Bankal dihang gisundan kini sa mga mamumuno.
Samtang si Vallar nga igo lang naagi sa dapit ang naigo sa saag nga bala diha sa iyang tuo nga dughan.
Daling miresponde ang mga kapolisan sa Mactan Police Station sa panghitabo apan nakaeskapo ang mga mamumuno sa ngitngit nga bahin sa Fuentes Street sa mao nga barangay.
Daling gidala sa Mactan Doctor's Hospital ang mga biktima apan patay na si Soreño.
Nasayran sa kapolisan nga si Soreño nag-atubang og kasong carnapping apan nakapiyansa ug duna usab kini kaaway nga mibahad nga patyon kini kun magkurus ilang dalan. Nakuha sa crime scene ang katorse ka basiyo ug lima ka slugs gikan sa gituohang bala sa .45 kalibreng armas. (BANAT NEWS)